Вясёлка школьных, летніх спраў
Аб тым, як праходзяць канікулы ў школе-інтэрнаце
Вясёлка школьных, летніх спраў
Нягледзячы на вакацыі, праца ў школьнай сталярнай майстэрні працягваецца. Вучні пад кіраўніцтвам майстроў вытворчага навучання Аднарогага А.В. і Кіслякова А.А. вырабляюць табурэты, лаўкі і іншыя гаспадарчыя рэчы для ўласных патрэб, пад заказ і на продаж. Неабходна абнавіць асарцімент драўляных вырабаў для ўдзелу ў восеньскім кірмашы.
Вырабы сталярнай майстэрні нашай школы-інтэрната зроблены з натуральнай драўніны, якасна і карыстаюцца попытам у жыхароў раёна і вобласці. А хлапчукі, калі працуюць у школьнай майстэрні, вучацца працаваць з рознымі інструментамі, апрацоўваць драўніну, і рабіць з яе патрэбныя ў быту рэчы.
З самага пачатку летніх канікул у школьнай швейнай майстэрні “горача”, але не ад летняй спёкі, а ад напружанай працы. Выхаванкі шыюць вырабы для кухні: абрусы, сурвэткі, пасцельную бялізну. Над новай калекцыяй сувенірных лялек дзяўчынкі працуюць пад кіраўніцтвам майстроў вытворчага навучання Івашкі В.А. і Кіцько М.А.
Жыццё школы-інтэрната ахоплівае розныя накірункі працоўнай дзейнасці дзяцей і дарослых. З пачаткам летніх канікул работы прыбавілася. Выхаванцы прыбіраюць школьную тэрыторыю, красяць агароджу, даглядаюць за клумбамі, стрыгуць кусты. Школьныя палеткі з пасадкамі цыбулі, морквы, капусты і буракоў таксама патрабуюць увагі. Кожны дзень вучні ў парніках дапамагаюць даглядаць за пасадкамі агуркоў, таматаў і перцаў. Заканчваецца высадка расады кветак. Лішкі прадаюць работнікам школы і арганізацыям, якія маюць патрэбу ў кветках.
Сумесная праца на карысць школы дае станоўчыя вынікі. Дзеці разумеюць – трэба дапамагчы дарослым у вырошчванні гародніны, бо ўсё вырашчанае прыйдзе на школьны стол, для іх харчавання. Лішкі гародніны школа прадае на кірмашы, або здае дзяржаве. А на атрыманыя грошы будуць набыты дадаткова фрукты ці сокі.
15.06.2020 Матэрыял падрыхтавала загадчыца бібліятэкі К.У.Кручок.
