Апошні школьны званок -2020
У Сенненскай школе-інтэрнаце адзвінеў апошні званок. Святочная лінейка ў чарговы раз сабрала навучэнцаў, настаўнікаў і выхавацелей школы. Ад прадстаўнікоў улады на лінейцы пысутнічаў Беразнеў Д.Г., першы намеснік начальніка Сенненскага РАУС, начальнік крымінальнай міліцыі.
Са словамі віншавання да ўсіх сабраўшыхся і выпускнікоў школы звярнуўся дырэктар школы-інтэрната. Леанід Леанідавіч Казлоў павіншаваў выпускнікоў і пажадаў ім поспеху на экзаменах і ў жыцці. Далей з віншаваннямі да вучняў звярнуўся Беразнеў Д.Г. Ён пажадаў адзінаццацікласнікам шансу на іспытах, абдуманага выбару прафесіі і поспехаў у самастойным жыцці. Потым былі ўрачыстыя віншаванні вучняў школы за дасягненні ў вучобе, конкурсах і выніковы ўдзел у спартыўных мерапрыемствах. Вучні атрымалі граматы і канверты з грашовай падзякай.
За шматгадовую, плённую працу, дасягнутыя поспехі ў навучанні і выхаванні падрастаючага пакалення граматай Міністэрства адукацыі Рэспублікі Беларусь была ўзнагароджана выхавацельніца першай выхаваўчай групы Макарава Таццяна Пятроўна.
Павіншавалі выпускнікоў і вучні малодшых класаў. Яны пажадалі ім быць працавітымі, добрымі і не забываць, у сваім дарослым жыцці, пра родную школу і падарылі вялікую сімвалічную падкову на шчасце і добрую памяць.
У адказ выпускнікі ўручылі ім салодкі падарунак і пажадалі малодшым школьнікам любіць сваю школу, свой край, паважаць настаўнікаў і доўжыць добрыя традыцыі школы-інтэрната.
Сёлетні апошні званок адрозніваўся ад мінулых не толькі адсутнасцю шматлікіх гасцей і сяброў школы. Адметным было і тое, што ў гэтым годзе школу заканчваюць 11 юнакоў. Замест вальса яны развіталіся са школай вясёлым флэш-мобам.
Былі і паветраныя шары, якія паняслі ў вышыню запаветныя пажаданні нашых юнакоў, а з імі і надзею на светлую і шчаслівую будычыню.
Матэрыял падрыхтавала загадчыца бібліатэкі К.У.Кручок
