Як мы гукалі вясну
«Гуканне вясны» — яркае і самабытнае народнае свята, якое да нашых дзён захавала сваю натуральнасць і жывасць. Каб развітацца з зімой і паскорыць надыход вясны, праводзіцца прыгожы і радасны абрад.
Вось і ў нашай школе 26 сакавіка адбылася гэта падзея, якая праводзілася ў рамках інавацыйнага праекта Міністэрства адукацыі “Укараненне этнакультурных тэхналогій для пашырэння і ўзбагачэння адукацыйнага асяроддзя ўстановы адукацыі”. Гасцямі на свяце былі начальнік Сенненскага раённага аддзела Следчага камітэта Рэспублікі Беларусь Мізаўцоў Аляксандр Вітальевіч з супрацоўнікамі і вядучы навуковы супрацоўнік лабараторыі праблем выхавання асобы Нацыянальнага інстытута адукацыі – Журба Аляксандр Фёдаравіч. Разам з дзецьмі яны прымалі ўдзел у правядзенні веснавога абрада.
Дарэчы, Сенненскі раённы аддзел Следчага камітэта пастаянна праводзіць з выхаванцамі профарыентацыйную работу, прафілактычныя бяседы, экскурсіі. А Аляксандр Фёдаравіч Журба аказвае метадычную і кансультатыўную дапамогу педагогам.
Гукальныя песні, карагоды, танцы і ўпрыгожванне дрэваў самаробнымі птушкамі – усё гэта было на нашым святкаванні. У час свята ўсіх частавалі печывам у выглядзе жаваранкаў. Прадстаўнікі Следчага камітэта прывезлі дзецям смачныя торты, а магазін «Санта» разнастайныя піцы.
Цудоўны настрой мерапрыемства падтрымліваўся добрым надвор'ем. Цяпер можна ўпэўненна сказаць: «Вясна прыйшла!»
