Жнівень. Працоўныя будні выхаванцаў школы-інтэрната
Жыццё школы-інтэрната ахоплівае розныя накірункі працоўнай дзейнасці дзяцей. У жніўні дзеці вярнуліся з адпачынку ў летніку “Бароўка”. А школа ўжо падрыхтавалася да новага навучальнага года. Адноўлены спальні, класы, актавая і спартыўная залы чакаюць сваіх вучняў. Выхаванцы з новымі сіламі ўключыліся ў дапамогу дарослым.
У жніўні работы прыбавілася. Выхаванцы прыбіраюць школьную тэрыторыю, даглядаюць за клумбамі, стрыгуць кусты. Школьныя палеткі з пасадкамі цыбулі, морквы, капусты і буракоў таксама патрабуюць увагі. Кожны дзень вучні ў парніках дапамагаюць збіраць ураджай агуркоў, таматаў і перцаў.
Надыйшла пара нарыхтоўкі яблыкаў. Нейкая частка пайшла на перапрацоўку - прыгатавалі джэм, частка адправіцца на часовае захаванне і на стол выхаванцам, а лішкі здадуць у нарыхтоўку. Пачалася ўборка бульбы і ў школе прайшоў “Дзень драніка”, ды не адзін. Дзеці з задавальненнем, дадаткова да школьнага меню, частуюцца смачнымі, паджарыстымі блінцамі са свежай школьнай бульбы.
Нашы дзеці добра разумеюць – трэба дапамагчы дарослым з уборкай гародніны, бо ўсё вырашчанае і ў час сабранае прыйдзе на школьны стол, для іх харчавання. Лішкі гародніны школа прадась на восеньскіх кірмашах, або здась дзяржаве. А на атрыманыя грошы будуць набыты дадаткова фрукты і сокі.
Матэрыял падрыхтавала загадчыца бібліятэкі К.У.Кручок.
