Следчыя павіншавалі выхаванцаў Сенненскай школы-інтэрната з Днём ведаў
Напярэдадні Дня ведаў ва ўпраўленні Следчага камітэта па Віцебскай вобласці праведзены дабрачынны збор, у якім бралі ўдзел шматлікія супрацоўнікі.
У сераду, 2 верасня, супрацоўнікі ўпраўлення Следчага камітэта па Віцебскай вобласці і Сенненскага РАСК прыехалі ў госці да дзяцей у Сенненскую школу-інтернат, у якой вучацца дзеці-сіроты і дзеці, якія засталіся без апекі бацькоў.
На парозе школы супрацоўнікаў Следчага камітэта сустрэлі дзяўчаты і хлопцы ў народнай вопратцы, а іх прыветныя словы гучалі на роднай беларускай мове. Пасля цудоўнай сустрэчы госці ўручылі дзецям падарункі, а яны ў сваю чаргу дарослым – сувеніры, зробленыя сваімі рукамі.
Прадстаўнікам Следчага камітэта правялі экскурсію па навучальнай установе, якая пачалася з актавай залы, дзе дзеці правялі паказ мод у льняных вопратках з вышыўкай. Калекцыя, якая была прадстаўлена, пашыта выхаванцамі з дапамогаю настаўнікаў.
У вольны ад заняткаў час дзеці разам з дарослымі працуюць: вырошчваюць сельскагаспадарчую прадукцыю, выпускаюць сталярныя і швейныя вырабы. Дарэчы, прадукцыю, якую выпускаюць выхаванцы, можна набыць, бо частка вырабляецца для патрэб школы і вучняў, а частка ідзе на продаж. У школе адраджаюцца народныя промыслы: саломапляценне і пчалярства. Дзеці таксама маюць магчымасць развівацца, наведваючы гурткі: цырульнае мастацтва, фларыстыка, дэкаратыўна-прыкладное мастацтва, кветкаводства, а таксама факультатыў па стварэнні відэаролікаў.
«Дзеці розныя бываюць, і цяжкія да выхавання, і тыя, хто не ведае, што такое сямейнае шчасце, але ж гэта ўсе нашы дзеці. Бо няма чужых дзяцей для педагогаў. Для нас яны ўсе свае. Нашы. Беларусы», - сказаў падчас экскурсіі дырэктар школы-інтэрната Леанід Казлоў.
Дырэктар таксама паведаміў аб гісторыі школы, аб сучасным этапе яе развіцця і перспектывах, аб лёсе выхаванцаў.
У школе-інтэрнаце паспяхова рэалізуецца інавацыйны праект Міністэрства адукацыі Рэспублікі Беларусь “Апрабаванне мадэлі практыка-арыентаванага адукацыйнага асяроддзя школ-інтэрнатаў для дзяцей-сірот і дзяцей, якія засталіся без апекі бацькоў, якая забяспечвае больш высокую эфектыўнасць сацыялізацыі і прафесійнага самавызначэння выхаванцаў". Дзеці атрымліваюць прафесійную падрыхтоўку па такіх спецыяльнасцях як, напрыклад, «сталяр», «швачка». Сення ў школе жывуць і навучаюцца 90 дзяцей.
Гэта школа – прытулак, дзе дзетак робяць сапраўднымі гаспадарамі-беларусамі, гаспадарамі свайго жыцця. Іх выхоўваюць самаадданыя настаўнікі. Навучанне ва ўстанове адукацыі праходзіць на беларускай мове.
Увазе гасцей былі прадстаўлены сталярныя и слясарныя майстэрні, швейныя цэхі і клас прыкладной творчасці. Дзеці гасцінна ў тэатралізаванай і вершаванай форме запрасілі супрацоўнікаў Следчага камітэта ў «Беларускую хатку», адноўленую навучэнцамі, дзе ім атрымалася сабраць і размясціць прадметы побыту нашых продкаў. Дарэчы, калекцыя з прадметаў даўніны немалая.
Супрацоўнікі Следчага камітэта жадаюць добрай долі і мірнага неба над галавою ўсім выхаванцам і педагагічнаму калектыву гэтай навучальнай установы!
У гэты ж дзень супрацоўнікі УСК па Віцебскай вобласці наведалі дапаможную школу №26 горада Віцебска, дзе падарылі канцылярскія рэчы першакласнікам.
Афіцыйны прадстаўнік УСК па Віцебскай вобласці
Аксана Лазько
