Восеньская сустрэча з сябрамі “БелТрансСпутніка”
Суботнім ранкам 21 верасня ў школе-інтэрнаце чакалі сяброў з ЧУП “БелТрансСпутніка”. Два разы ў год супрацоўнікі гэтага прыватнага прадпрыемства наведваюць нашу школу-інтэрнат з валанцёрскай місіяй. Вось і зараз, дваццаць валанцёраў на чале з дырэктарам Тоўсцік Ядвігай Уладзіміраўнай завіталі ў госці да выхаванцаў.
Госці з кароткай экскурсіяй прайшліся па школе, зазірнулі ў кабінет дадатковай адукацыі, дзе вучні першай групы займаліся вырабам сувеніраў. Таксама наведалі пакоі спальнага корпуса.
Сумесна з гасцямі былі арганізаваны гульнёва-забаўляльныя меропрыемствы. Разгарнулі работу майстар-класы: “Слайм”, “Выраб фігур з паветраных шароў”, “Стрынг-арт”, майстэрні па вырабу бранзалетаў, роспісу пернікаў і мастацкаму роспісу маек.
Потым усіх запрасілі на музычна-танцавальную праграму з удзелам рэп-артыстаў з г.Мінска. Праграма праходзіла на пляцоўцы каля параднага ўваходу ў школу.
Далей дзеці віталі і дзякавалі валанцераў з “БелТрансСпутніка”за цудоўную сустрэчу, цікава праведзены час і падарункі ў міні-канцэрце “Вітаем сяброў!”
Падчас абеда гасцей запрасілі на прэзентацыю заняткаў факультатыва «Дамашняя кулінарыя». Вучні прадставілі прыгатаваныя на занятках бутэрброды-канапэ, выпечку і частавалі гасцей духмянай гарбатай.
На развітанне выхаванцы школы-інтэрната атрымалі ў падарунак ад ЧУП “БелТрансСпутніка” канцылярскія прылады, гульні і розныя смачнасці.
Матэрыял падрыхтавала загадчыца школьнай бібліятэкі К.У.Кручок
